Una Navidá al serviciu de la cultura

/, Destacaos, Grupu Municipal, Roberto Sánchez Ramos/Una Navidá al serviciu de la cultura

Una Navidá al serviciu de la cultura

Teatru, cine, música, ballet, biblioteques, actividaes infantiles, talleres nos centros sociales, actividaes pa la mocedá… Uviéu vístise, nestes fiestes navidiegues, de cultura nel ampliu sentíu de la palabra.
Esti gran volume d’actividaes, que supera les 150, foi posible gracies a la collaboración ya interés de distintes conceyalíes que punxeron les sos propuestes a disposición del programa cultural navidiegu. Dalguna d’elles, como la conceyalía d’atención a les persones, con más de 60 eventos programaos nos centros sociales.
El conceyal de cultura, Roberto Sánchez Ramos, tamién presidente de la SOF (Sociedá Uvieina de Festexos), apostó dende’l principiu pola collaboración de les distintes árees nes actividaes culturales, entendiendo la cultura como una palabra de llargu percorríu que toma tantu actividaes artístiques como educatives, y que puede realizase nos teatros según nes places de los barrios y pueblos del conceyu.
Les artes escéniques tienen nesta Navidá cultural un papel fundamental. El Teatru Campoamor, la Filarmónica, el Teatru Pumarín y el Casino de Trubia, son los escenarios escoyíos pa faer llegar esta disciplina artística a los más pequenos con adaptaciones d’obres clásiques como “Suañu d’una Nueche de Branu” de Shakespeare o’l cuentu “Hansel y Gretel” de los Hermanos Grimm. Pero tamién, el públicu infantil va poder esfrutar de conciertos, maxa, cine, cuentacuentos y talleres nes biblioteques y los centros sociales.
Los adultos tamién tien el so espaciu nesti programa navidiegu, coles actuaciones imprescindibles del Ballet Nacional Rusu y los recitales de música clásica como’l Conciertu d’Añu Nuevu. Pero la ufierta amplíase munchos más con teatru, cine, talleres de cocina y ellaboración d’adornos navidiegos, ruta de Belenes de Cumes pela zona rural y una amuesa de curtiumetraxes, ente otres.
Otru de los grandes retos, nesta conxugación de propuestes, foi llograr una programación interesante pa los mozos ente los dolce y los diecisiete años, pero dende’l Proyectu Dolce17, la conceyalía d’Atención a les Persones punxo a disposición les sos actividaes según la conceyalía d’Educación con talleres d’escritura empobinaos a esti públicu nes principales biblioteques d’Uviéu.
Amás, y tamién pa los mozos, nestes fiestes hai espaciu inclusive pa la ciencia y la tecnoloxía, gracies los talleres que se realicen nel Espaciu Coworking Turria de La Ería empobinaos a un públicu adolescente. Nestos talleres pueden aprender nociones básiques de programación informática, familiarizase colos principios de la robótica o afayar cómo funcionen los módulos electrónicos pa faer proyectos de sensores de lluz y soníu.
“L’oxetivu ye claro, convertir a Uviéu nuna ciudá cultural pa tolos públicos y que les actividaes lleguen a tolos rincones del conceyu mientres estes fiestes navidiegues”, esplica’l conceyal de cultura, Roberto Sánchez Ramos.
Pero les nueves propuestes nun supunxeron una perda de les tradicionales como’l famosu Belén qu’esibe l’Asociación Belenista d’Uviéu y que cada añu recibe más visites, llevando nesti momentu más de 35.000 visitantes. El nuevu allugamientu, dende la Navidá pasada, na Plaza de Trascorrales, ye reconocida a día de güei como un aciertu” por munchos de los curiosos que s’averen a almirar el so cuidu detallismo, y asina lo dexen reflexáu nel llibru de visites nel que pueden escribir les sos opiniones.
Hai otres actividaes que tamién siguen como ye’l casu de la Feria de la Navidá na Plaza de la Escandalera, onde s’asitien dende’l 3 d’avientu al 8 de xineru una serie de puestos comerciales y artesanía. Esti mercadín ye bien transitáu y convirtióse nun llugar imprescindible nes tradicionales compres navidiegues.
La Navidá uvieina tampoco s’entendería ensin la Cabalgata de los Reis Magos que, como tolos años va celebrar a partir de les 18:30h el día 5 de xineru y va percorrer delles cais del centru de la ciudá. Pero tamién , hai que destacar que mientres tou esi día dos “Cortexos Reales” van percorrer los núcleos rurales del conceyu, dende Tudela Veguin hasta Les Campes, pasando pola Manjoya, San Esteban de les Cruces, San Cloyo o Cualloto, ente otros.
Una pista de patinaxe sobre xelu pa toles edaes Una de los grandes apuestes d’estes fiestes navidiegues de 2016 foi la pista de patinaxe sobre xelu que s’instaló na Plaza de la Catedral. “Anguaño llogremos sacar alantre’l proyectu de manera gratuita dexando esti espaciu a una empresa asturiana. El gobiernu del PP pagó, nel so día, pela pista de patinaxe que contrataron, 24.000 euros”, esplica’l conceyal de cultura y festexos.
Nesti momentu casi 15.000 persones esfrutaron yá d’un ratu risonderu nesta pista de patinaxe que dexa la entrada a neños y mayores, con horarios flexibles a toles realidaes y precios algamadizos. “Entá queden munchos díes de fiestes per delantre, pero dende’l Conceyu creemos que vamos superar los niveles de participación al respective de otros años tantu nesta actividá como en munches otres”, asegura Sánchez Ramos.

A última hora, la maxa de la Navidá pa los más pequenos nun ta reñida coles actividaes culturales sinón que dambes modalidaes compleméntense y texen un nuevu modelu festivu que pon a la ciudá en funcionamientu, enllena los sos teatros y les sos cais y arriquez un pocu más los momentos qu’en Navidá compartimos con familiares o seres queríos. “L’oxetivu ye senciellu, que tolos vecinos y vecines d’Uviéu esfruten al máximu de les fiestes, que puedan tener una ufierta cultural variada y accesible, calteniendo pal futuru lo que gusta y funciona y ameyorando naquello que la ciudadanía demande”, conclúi’l conceyal.

2017-01-17T13:29:40+00:00 25 avientu, 2016|Actualidá, Destacaos, Grupu Municipal, Roberto Sánchez Ramos|