Énte les declaraciones de la conceyala de participación en rellación col repartu a los distritos del presupuestu previstu en función de la renta, la direición d’IU d’Uviéu y el grupu municipal quieren tresmitir a militantes y simpatizantes la so postura sobro’l particular.
Siempre defendimos los distritos como un elementu de participación ciudadana perimportante y urximos a la so constitución y puesta en furrulamientu de forma normalizada. Llevamos dellos años de retrasu pola resistencia del PP a otorgar dicha participación. Esti gobiernu ha ser quien d’echar a andar los distritos ensin que nengún elementu distorsionante torgue’l procesu.
Compartimos n’absoluto’l criteriu del repartu en función de la renta de cada distritu, ye demagóxico y populista. La discriminación positiva pa cada zona d’Uviéu ha de facese dende’l presupuestu, volcando los recursos pa coles necesidaes de cada barriu, de cada nucleu, iguando carencies n’infraestructures y servicios, llevando les inversiones a onde más se necesiten.
El presupuestu empobináu a ser xestionáu direutamente por cada distritu ha ser igual pa toos, puesto que la so cuantía (daqué más de 100.000€ pa caún) nun permitiría, nin ye la so función prevista, solventar les desigualdaes ente unes zones y otres d’Uviéu.
Naguamos por un futuru próximu, con un funcionamientu normalizáu, los distritos sirvan pa xestionar más recursos y pa una verdadera descentralización alministrativa, que se conviertan en ferramientes potentes de participación. Pa ello ye necesario tener criterios políticos mui claros y democráticos y nun introducir elementos de discordia, discriminación o menoscabu. Neso IU coincide coles asociaciones vecinales: participación real de la ciudadanía ensin dirixismos nin ocurrencies mesiániques.
